Shoqata e Gazetarëve Evropianë (AEJ), dega Shqipëri, shprehet prerazi kundër qëndrimit të mbajtur ditën e sotme nga Kryeministri Edi Rama gjatë konferencës për media, i cili u pasua me përjashtimin e gazetares së “Syri TV”, Ambrozia Meta.
AEJ Shqipëri shpreh shqetësimin e saj të thellë për reagimin e Kryeministrit ndaj gazetares dhe pozicionohet hapur kundër praktikës së përjashtimit të çdo gazetari që raporton mbi zhvillimet në Kryeministri. Liria e informimit dhe aksesi i pakushtëzuar i medias në institucionet publike janë shtylla të patjetërsueshme të një shoqërie demokratike.
Në këtë kuadër, AEJ i bën thirrje urgjente Kryeministrisë:
- Të lejojë menjëherë pjesëmarrjen e gazetares Meta në konferencat e ardhshme.
- Kryeministri të ruajë etikën zyrtare dhe profesionale ndaj gazetarëve dhe medias në tërësi.
Shkelja e etikës nga kreu i qeverisë mbart pasoja të rënda, pasi shërben si një model negativ që nxit qasjen agresive të shoqërisë ndaj punonjësve të medias dhe minon lirinë e shtypit.
Për këtë incident, AEJ do të informojë zyrtarisht të gjitha platformat ndërkombëtare të monitorimit të lirisë së medias dhe organizatat partnere në Evropë.